វប្បធម៌ និងបរិយាកាសការងារ

បន្ទាប់ពីបញ្ចប់គម្រោងការងារធំមួយ ឬសប្តាហ៍ដែលមានសម្ពាធការងារខ្ពស់ កុំរួសរាន់ចូលទៅក្នុងភារកិច្ចបន្ទាប់ភ្លាមៗ។ អ្នកត្រូវការពេលវេលាដើម្បីស្ដារឡើងវិញ ដូចជាការដកដង្ហើមបន្ទាប់ពីការរត់លឿនដូច្នោះដែរ។
គន្លឹះ៖ កំណត់ “ថ្ងៃបម្រុងបន្ថែម”សម្រាប់ខ្លួនអ្នក ដែលគ្មានកិច្ចប្រជុំ ឬថ្ងៃផុតកំណត់បញ្ចប់ការងារនោះទេ អ្នកគូរប្រើវាសម្រាប់ការពិចារណាលើអ្វីដែលបានរៀន ការរៀបចំឡើងវិញ ឬសម្រាកដកឃ្លា។

ការងារមានសារៈសំខាន់ ដូចជីវិតក្រៅការងារផងដែរ។ អ្នកអាចកំណត់ព្រំដែនដែលជួយឲ្យអ្នកមានពេលវេលានៅជាមួយក្រុមគ្រួសារ ឬធ្វើអ្វីដែលអ្នកចូលចិត្តដើម្បីឆ្លើយតបទៅនឹងសុខដុមផ្លូវចិត្តរបស់ខ្លួន។
គន្លឹះ៖ កុំព្យាយាមពិនិត្យអ៊ីមែលក្រោយម៉ោងធ្វើការ លើកលែងតែជាការងារបន្ទាន់។

កិច្ចប្រជុំអាចមានប្រយោជន៍ ប៉ុន្តែច្រើនពេកអាចធ្វើឲ្យអ្នកបាក់កម្លាំង សូមអនុញ្ញាតឲ្យខ្លួនឯងមានពេលវេលាដែលគ្មានកិច្ចប្រជុំ ដើម្បីអាចបញ្ចប់ភារកិច្ចណាមួយដែលនៅក្នុងដៃ ឬសម្រាប់ការពិចារំណាដែលត្រូវការពេល ឬការគិតល្អិតល្អន់ណាមួយ។
គន្លឹះ៖ អ្នកអាចចាប់ផ្តើម កំណត់២-៣ម៉ោង ឬមួយថ្ងៃក្នុងមួយសប្តាហ៍សម្រាប់ការងារដែលត្រូវការពេលផ្តោតអារម្មណ៍ ឬ “ថ្ងៃសុក្រ​គ្មានកិច្ចប្រជុំ”ជាដើម។

ការរងសម្ពាធការងារជាទូទៅវាគឺជារឿងធម្មតា ប៉ុន្តែអ្វីដែលសំខាន់នោះគឺអ្នកត្រូវដឹងថានរណាអាចជាមនុស្សដែលអាចផ្តល់ការគាំទ្រ ការជួយ ឬការណែនាំនៅពេលចាំបាច់បាន​ ពួកគាត់អាចជាអ្នកណែនាំ អ្នកគ្រប់គ្រងរបស់អ្នក ឬមិត្តម្នាក់ដែលអាចទុកចិត្តបាន​ ពួកគាត់ពិតជាអាចមានឥទ្ធិពលយ៉ាងសំខាន់ក្នុងការបង្កើតការផ្លាស់ប្តូរដ៏មានអត្ថន័យក្នុងជីវិតការងាររបស់អ្នក។​
ការគាំទ្រខ្លះទៀតមិនចាំបាច់ត្រូវមានលក្ខណៈផ្លូវការទេ វាអាចជាពេលអ្នកចូលរួមលេងកីឡា និយាយជាមួយគ្រូបង្វឹក ឬធ្វើអ្វីដែលធ្វើឱ្យអ្នកមានសុភមង្គល អាចជួយឱ្យអ្នកស្ដារថាមពល និងមានអារម្មណ៍ល្អត្រលប់មកវិញ។

អ្នកមិនចាំបាច់រង់ចាំទាល់តែមានការតែងតាំង ឬសមិទ្ធផលធំៗដើម្បីធ្វើឱ្យអ្នកមានមោទនភាពនោះទេ រាល់ជំហានតូចៗដែលអ្នកបានធ្វើទៅមុខ គឺជាផ្នែកសំខាន់នៃការរីកចម្រើន ហើយវាសមនឹងត្រូវបានទទួលស្គាល់ផងដែរ។
គន្លឹះ៖ ចំណាយពេលបន្តិចដើម្បីទទួលស្គាល់សមិទ្ធផល ឬជំហានតូចៗដែលអ្នកបានធ្វើល្អក្នុងសប្ដាហ៍នេះ ត្រូវចាំថារាល់សកម្មភាពល្អៗទាំងនោះអាចបូកបញ្ជូលគ្នា ទៅជាភាពជោគជ័យដ៏ធំមួយបាន។

អ្នកមិនចាំបាច់ជាអ្នកជំនាញហិរញ្ញវត្ថុទេ​ ប៉ុន្តែការយល់ដឹងអំពីរបាយការណ៍ហិរញ្ញវត្ថុមូលដ្ឋាន​ ដូចជា របៀបដែលក្រុមហ៊ុនរកចំណូល ចំណាយ និងសន្សំ អាចជួយឲ្យអ្នកយល់ឃើញទិដ្ឋភាពទូលំទូលាយនៃអាជីវកម្ម។អ្នកអាចសាកល្បងរៀនមើលរបាយការណ៍ចំណូល ឬស្នើសុំឲ្យអ្នកផ្នែកហិរញ្ញវត្ថុជួយបកស្រាយ។

បង្កើតទម្លាប់ក្នុងការអានអត្ថបទវិជ្ជាជីវៈ ស្តាប់កម្មវិធី podcast ឬតាមដានអ្នកជំនាញក្នុងវិស័យរបស់អ្នក។ ការយល់ដឹងអំពីនិន្នាការថ្មីៗ និងសកម្មភាពដែលគូរប្រកួតប្រជែងកំពុងធ្វើ នឹងជួយឲ្យអ្នកមានភាពឆ្លាតវៃ និងអាចចូលរួមផ្តល់យោបល់ដែលមានតម្លៃមកកាន់ក្រុមហ៊ុន។
 

រៀនសំលឹងមើលក្រៅរង្វង់នៃក្រុមការងារ ឬផ្នែករបស់អ្នក ហើយស្វែងរកឱកាសដើម្បីភ្ជាប់ទំនាក់ទំនងជាមួយក្រុមផ្សេងៗដូចជា ផ្នែកទីផ្សារ ប្រតិបត្តិការ ឬហិរញ្ញវត្ថុ។ ការយល់ដឹងពីរបៀបដែលផ្នែកផ្សេងៗធ្វើការរួមគ្នា នឹងផ្តល់ឲ្យអ្នកនូវការយល់ដឹងទូលំទូលាយ ព្រមទាំងដំណើរការសម្រេចចិត្តក្នុងក្រុម។
 

កុំភ័យខ្លាច ឬស្ទាក់ស្ទើរក្នុងការសួរនាំ​ មិនថាជាការសន្ទនាជាមួយអ្នកគ្រប់គ្រង ឬការចូលរួមកិច្ចប្រជុំក្រុម។ ការស្វែងយល់ពីបទពិសោធន៍ និងទស្សនៈរបស់អ្នកដទៃអាចជួយឲ្យអ្នកភ្ជាប់ការងារប្រចាំថ្ងៃទៅនឹងគោលដៅធំរបស់ក្រុមហ៊ុនបានយ៉ាងមានប្រសិទ្ធភាព។

ប្រើប្រាស់ឱកាសក្នុងការចូលរួមវគ្គសិក្សាអនឡាញ សិក្ខាសាលា ឬវគ្គបណ្តុះបណ្តាលនានា។ មិនថាជាវគ្គខ្លីអំពីយុទ្ធសាស្ត្រអាជីវកម្ម ឬការសិក្សាបន្ថែមអំពីហិរញ្ញវត្ថុ រាល់ការសិក្សានឹងជួយបង្កើនជំនាញ និងជំនឿចិត្តលើខ្លួនអ្នកបាន។

អនុវត្តតាមការទទួលខុសត្រូវដោយមិនចាំបាច់ឱ្យមានការរំលឹក។ ប្រសិនបើអ្នកជួបឧបសគ្គ សូមជម្រាបទៅថ្នាក់លើជាមុន។

ប្រសិនបើមានអ្វីមិនប្រក្រតី កុំបិទបាំង។ សូមទទួលស្គាល់ រៀនពីវា ហើយរកដំណោះស្រាយដើម្បីកែសម្រួល។
 

បញ្ចប់ការងារតាមពេលកំណត់ ឬជម្រាបទៅថ្នាក់លើឬក្រុមការងាររបស់អ្នក ប្រសិនបើអ្នកត្រូវការពេលបន្ថែម។ វាជួយបង្កើតការទុកចិត្តជាមួយក្រុម។

ជម្រុញភាពមានទំនួលខុសត្រូវដោយការត្រួតពិនិត្យយ៉ាងសមស្រប និងផ្តល់ជំនួយនៅពេលចាំបាច់។
 

បង្កើតសំនួរសួរខ្លួនឯង “តើខ្ញុំបានធ្វើអ្វីដែលខ្ញុំបានសន្យាឬអត់?” និង “តើអំពើរបស់ខ្ញុំមានឥទ្ធិពលដូចម្តេចលើក្រុម?”

មុនពេលចូលមើលអ៊ីមែល ឬចូលប្រជុំ សូមដកឃ្លាបន្តិច។ បិទភ្នែក ដកដង្ហើមវែងៗ ហើយគិតពីគោលបំណងសម្រាប់ថ្ងៃនេះ។ វាជាវិធីសាមញ្ញមួយដែលជួយឱ្យអ្នកមានស្ថិរភាពក្នុងអារម្មណ៍ និងចាប់ផ្តើមថ្ងៃធ្វើការដោយមានភាពច្បាស់លាស់ និងសុខសាន្ត។

ស្វែងរកជ្រុងស្ងប់ស្ងាត់មួយនៅការិយាល័យ ដែលអ្នកអាចទៅសម្រាកបានបន្តិច។ វាមិនចាំបាច់ត្រូវមានការតុបតែងស្អាតពេកទេគ្រាន់តែជាកន្លែងមួយដែលជួយអោយអ្នកអាចដកដង្ហើម ធ្វើសមាធិ ឬសម្រាកដោយគ្មានការរំខាន។ កន្លែងតូចៗបែបនេះអាចជួយឱ្យអ្នកមានអារម្មណ៍ស្ងប់ស្ងាត់ និងស្ដារឡើងវិញថាមពលក្នុងថ្ងៃធ្វើការ។

កំណត់ពេលសម្រាករៀងរាល់ពីរម៉ោងម្តង។ អ្នកអាចពត់ខ្លួនបន្តិច ដើរជុំវិញការិយាល័យ ឬគ្រាន់តែដកឃ្លាចេញពីអេក្រង់បន្តិច។ ការសម្រាកតូចៗទាំងនេះជួយឱ្យខួរក្បាលស្រស់ស្រាយ បន្ថយភាពតានតឹង និងជួយឱ្យអ្នកមានថាមពលបន្តការងារបានល្អជាងមុន។

យកពេលប្រហែល ៥ នាទីសម្រាប់ដកដង្ហើមវែងៗ ឬធ្វើសមាធិ។ វាជួយឱ្យអ្នកមានស្ថិរភាពក្នុងអារម្មណ៍ បន្ថយភាពតានតឹង និងធ្វើឱ្យខួរក្បាលស្រស់ស្រាយ។ មិនចាំបាច់ធ្វើអ្វីសម្បូរបែបទេ គ្រាន់តែអង្គុយស្ងៀមៗ ដកដង្ហើមយ៉ាងជ្រៅ និងសង្កេតអារម្មណ៍របស់ខ្លួន។

មិនថាអ្នកកំពុងសរសេរអ៊ីមែល ចូលរួមប្រជុំ ឬញុំាអាហារ សូមព្យាយាមផ្តោតអារម្មណ៍លើអ្វីដែលអ្នកកំពុងធ្វើ។ រីករាយនឹងរសជាតិអាហារ ពិចារណាលើពាក្យដែលអ្នកសរសេរ ហើយព្យាយាមទាញអារម្មណ៍ឱ្យស្ថិតនៅក្នុងពេលបច្ចុប្បន្ន។ ការយល់ដឹងតូចៗទាំងនេះអាចជួយឱ្យថ្ងៃធ្វើការរបស់អ្នកមានភាពស្រួល និងមានអត្ថន័យជាងមុន។